न्यूजमधेश डेस्क
बुटबल ,२४ माघ । लुम्बिनी प्रदेशसभाका उपसभामुख कृष्णीकुमारी थारुले समाज रुपान्तरणको अभियानलाई अझै सक्रिय ढङ्गले अगाडि बढाउनुपर्ने बताउनुभएको छ ।
सञ्चारिका समूह रुपन्देही र साहसी कदम नेपालले सामाजिक अभियान्ता र पत्रकार महिलाबीचमा आज बुटवलमा आयोजना गरेको अनुभव आदानप्रदान कार्यक्रममा उहाँले लैङ्गिक तथा यौनिक अल्पसङ्ख्यकको मुद्दालाई बलियो बनाउन सामाजिक अभियान्ता अझै जागरुक हुनुपर्ने बताउनुभयो । उहाँले आर्थिक रुपमा आत्मनिर्भर नहुँदासम्म महिला सधैँ पछाडि पर्ने उल्लेख गर्दै अब उद्योग, पर्यटन जस्ता क्षेत्रमा महिलालाई सक्रिय सहभागी बनाउनुपर्नेमा जोड दिनुभयो ।
उपसभामुख थारुले महिला अधिकारको रक्षा र सशक्तीकरणका लागि बलियो सञ्चारसंस्था र महिला पत्रकारको विशेष भूमिका रहने बताउँदै आफू कम्लहरी हुँदा धेरै पीडा सहेकाले अरुले सहन नपरोस् भन्ने उद्देश्यले नै मुक्तीको आन्दोलनको नेतृत्व गर्दै प्रदेशसभाको यात्रा तय गरेको अनुभव सुनाउनुभयो । उहाँले प्रदेशसभाबाट लैङ्गिकमैत्री कानून बनाउन आफ्नो सक्रियता रहने प्रतिबद्धता पनि व्यक्त गर्नुभयो ।
राष्ट्रिय मानव अधिकार आयोग लुम्बिनी प्रदेशका प्रमुख सम्झना शर्माले अधिकारमुखी संस्थामा काम गर्दा लैङगिकमैत्री वातावरण नहुँदा समस्या भोग्नुपरेको अनुभव सुनाउनुभयो । गैरसरकारी संस्था महासङ्घका केन्द्रीय उपाध्यक्ष सुमित्रा शर्माले पितृसतात्मक सोच र व्यवहारका कारण सामाजिक क्षेत्रमा महिलाले समस्या भोग्नुपरेकाले सबै मिलेर सशक्त रुपले आवाज उठाउनुपर्ने बताउनुभयो ।
सञ्चारिका समूह रुपन्देहीका सल्लाहकार माया गौतम, इन्दिरा अर्याल र अमृता अनमोलले महिला भएकै कारण पत्रकार महिलालाई गर्ने व्यवहार फरक भएको बताउँदै परिवर्तनका पक्षमा निरन्तर कलम चलाउनुपर्नेमा जोड दिनुभयो ।
सञ्चारिका समूहका अध्यक्ष निरु गौतमले समाज परिवर्तन, न्याय र अधिकारका लागि सञ्चारिकामा आबद्ध पत्रकार महिलाले निरन्तर कलमको माध्यमबाट आवाज उठाउँदै आएको बताउनुभयो ।
कदम नेपालका अध्यक्ष इन्दिरा आचार्यले हिंसा प्रभावित महिलाको न्याय र अधिकारका लागि काम गर्दा मानसिक रुपमा पिरोलिनु परेको अनुभव सुनाउँदै सञ्चारसंस्थामा समाचार आएकै कारण पीडितलाई न्यायका लागि बल मिल्ने बताउनुभयो ।
साहसी कदम नेपालका अध्यक्ष आनिक रानाले पत्रकार महिलाका कारण यौनिक तथा अल्पसङ्ख्यक समुदायका आवाज उठाउन सजिलो भएको बताउनुभयो ।
