न्यूजमधेश डेस्क
काठमाडौं ,१८ जेष्ठ । विवेकशील साझा पार्टीका पूर्वअध्यक्ष उज्ज्वल थापाको निधन भएको छ। उपचारमा सम्लग्न एक चिकित्सकले थापाको निधन भएको पुष्टि गरे।
‘हामीले सकेजति कोसिस गरेका थियौ। तर, उहाँको आज उपचारका क्रममा निधन भयो,’ ती चिकित्सकले भने।
दुई साताअघि कोरोना संक्रमित भएपछि उनलाई सुरुमा ह्याम्स अस्पताल भर्ना गरिएको थियो। त्यसपछि उनलाई ग्राण्डी अस्पताल र त्यसपछि मेडिसिटी अस्पताल भर्ना गरिएको थियो। उपचारका क्रममा कोरोना नेगेटिभ आए पनि अवस्था गम्भीर बनेको थियो।
थापाको मेडिसिटी अस्पतालमा एक्स्ट्राकर्पोरियल मेम्ब्रेन अक्सिनेसन एक्मो विधिमार्फत् उपचार गरिएको थियो। उनको अवस्था गम्भीर भएको समाचार सार्वजनिक भएपछि उनको उपचारका लागि सहयोग रकम जम्मा गरिएको थियो।
