न्यूजमधेश डेस्क
काठमाडौं ,२६ जेष्ठ ।नवनियुक्त संस्कृति, पर्यटन तथा नागरिक उड्डयनमन्त्री उमाशंकर अरगरियाले त्रिभुवन अन्तर्राष्ट्रिय विमानस्थलको अनुगमन गरेका छन्।
मन्त्रालयका सचिव यादव कोइराला, नागरिक उड्ययन प्राधिकरणका महानिर्देशक राजन पोखरेल र विमानस्थल कर्मचारीसहित मन्त्री अरगरिया बुधबार दिउँसो विमानस्थल अवलोकनमा पुगेका हुन्।
विमानस्थल अवलोकनका क्रममा मन्त्री अरगरियाले त्यहाँको अन्तर्राष्ट्रिय टर्मिनलमा नवनिर्मित आगमन कक्षको उद्घाटन गरेका छन्।
मन्त्री अरगरियाले अवलोकनका क्रममा सेवा चुस्त दुरुस्त बनाउन कर्मचारीलाई निर्देशन दिए। उनले कोभिड-१९ महामारीलाई ध्यानमा राखेर स्वास्थ्य-सुरक्षाका मापदण्ड पालना गराउन पनि निर्देशन दिएका उनको सचिवालयले जनाएको छ।
