- न्यूजमधेश डेस्क
काठमाडौं,२६ जेष्ठ । संघीय मामिला तथा सामान्य प्रशासनमन्त्री राजेन्द्र श्रेष्ठमाथि कार्यकक्षमा हातपात भएको छ ।
बिहीबार जनता समाजवादी पार्टी (जसपा) का तर्फबाट मन्त्री बनेका श्रेष्ठमाथि उनको कार्यकक्ष सिंह दरबारमै हातपात भएको हो । श्रेष्ठमाथि सो पार्टीकै सांसद रामबाबू यादवले आफ्नो क्षेत्रमा बजेट नहालेको भन्दै हातपात गरेका थिए । यादवले हातपात गर्न खोजेपछि मन्त्री श्रेष्ठलाई उनका पीएसओले बचाएका हुन् ।
आफ्नो क्षेत्रमा बजेट नहालेको भन्ने विषयमा विवाद बढ्दै गएपछि मन्त्रीमाथि हातपात गरेका थिए । सांसद यादवले हातपात गरेपछि मन्त्रीको सुरक्षा गार्डले जोगाएका थिए ।
मन्त्री श्रेष्ठको कार्यकक्षमा अन्य सांसदहरुसहित पुगेका यादवले अश्लिल गाली गलौच गरेका थिए । ‘उहाँहरुबीच सुरुमा राम्रै कुराकानी हुँदै थियो बजेटको विषयमा छलफल हुँदाहुँदै आफ्नो क्षेत्रको लागि उपयुक्त बजेट नछुट्याएकोमा सांसद यादव अलि आक्रोशित हुनुभयो उहाँले त मन्त्रीलाई हातपात नै गर्नुभयो,’ मन्त्रीको कार्यकक्षमा रहेका एक सहभागीले भने ।
मन्त्री श्रेष्ठ जसपाबाट सरकारमा सहभागी छन् । उनलाई हातपात गर्ने सांसद पनि जसपाकै हुन् । केही दिनदेखि मन्त्री परिवर्तनको विषयलाई लिएर जसपाभित्र विवाद भइरहेको छ ।
