न्यूजमधेश डेस्क
जनकपुरधाम,२९ जेष्ठ । महोत्तरीको जलेश्वरमा बोक्सीको आरोपमा दुई जना महिलालाई कुटपिट गरेको भन्दै प्रहरीले दुई जनालाई पक्राउ गरेको छ ।
जलेश्वर नगरपालिका ६ धबौली निवासी ५३ बर्षीया कालोदेवी र ५४ बर्षीया दुलरिया देवीलाई स्थानीय केहि व्यक्तिले बोक्सीको आरोपमा कुटपिट गरेको प्रहरीले जनाएको छ ।
स्थानीय सोमन भनिने सोमारी देवीसहितकाले दुबैको चूलठो समातेर हात, लाठी र लाती समेतले कुटपिट गरी घाइते बनाएको जिल्ला प्रहरी कार्यालय महोत्तरीका प्रहरी निरीक्षक सरोज राईले जानकारी दिए ।
उनीहरुले दुबै महिलालाई २६ जेठको बिहान कुटपिट गरेको राईले बताए । ‘भूतप्रेत लगाएको भन्दै उनीहरुले दुबैलाई कुटपिट गरेका रहेछन्’ प्रहरी निरीक्षक राईले भने, ‘घट्नामा संलग्न दुई जनालाई पक्राउ गरिएको छ ।’
पक्राउ पर्नेमा सोही ठाउँका ४५ बर्षीय भुलन राम र २८ बर्षीया सोमनी भनिने सोमारी देवी छन् । उनीहरुबिरुद्ध बोक्सीको आरोप लगाई कुटपिट गरी ज्यान मार्ने उद्योग शिर्षकमा मुद्दा दर्ता गरी घट्नामा संलग्न भई फरार भएका अन्यको खोजतलाश भइरहेको प्रहरीले जनाएको छ ।
