न्यूजमधेश डेस्क
काठमाडौं,३० भाद्र। लोकतान्त्रिक समाजवादी पार्टीका तर्फबाट प्रतिनिधि सभा सदस्य तथा सचेतक उमाशंकर अरगरिया एमाले प्रवेश गर्ने भएका छन्। आफू एमाले प्रवेश गर्न लागेको उनले पुष्टि गरे।
अरगरियालाई पार्टी प्रवेश गराउनका लागि एमाले अध्यक्ष केपी शर्मा ओली यही असोज ८ गते अरगरियाको क्षेत्र धनुषा-२ जाने बताइएको छ।
२०७४ को निर्वाचनमा अरगरिया धनुषा-२ बाट तत्कालीन संघीय समाजवादी फोरमको उम्मेदवारको रुपमा जितेका थिए। त्यतिबेला उनले ३२ हजार ४४ मत पाएका थिए। उनका निकटतम प्रतिस्पर्धी माओवादी केन्द्रका रामचन्द्र झाले भने १८ हजार ७१५ मत पाएका थिए।
संघीय समाजवादी फोरम र नयाँ शक्ति पार्टीबीच एकता भएर समाजवादी पार्टी गठन भएको थियो। सो पार्टीले राष्ट्रिय जनता पार्टीसँग एकता गरी जनता समाजवादी पार्टी गठन भएको थियो। जसपा विभाजनका बेलामा भने उनी उपेन्द्र यादव नेतृत्वको पार्टी नलागी महन्थ ठाकुर नेतृत्वको पार्टी लोसपातिर लागेका थिए।
अरगरियालाई लोसपाबाट पुनः धनुषा-२ बाटै उम्मेदवार बन्न एकल सिफारिसमा परेका थिए। तर, उनी भने एमाले प्रवेश गर्न लागेका हुन्।
