कलैया : जनता समाजवादी पार्टीका अध्यक्ष उपेन्द्र यादव बारा-२ मा को उपनिर्वाचनमा चुनावी मैदानमा छन्। उनको पार्टीबाट निर्वाचित भएका सांसद रामसहाय यादव उपराष्ट्रपति बनेपछि बारा -२ मा वैशाख १० गते उपनिर्वाचन हुन लागेको हो।
उक्त उपनिर्वाचनमा जसपा अध्यक्ष यादव चुनावी मैदानमा होमिएका छन्। एकपटक पराजित भएपछि पाँच वर्षसम्म पनि कुर्न नसक्ने यादव छोटो बाटोबाट सत्तामा पुग्ने भर्याङका रुपमा बारा-२ को उपनिर्वाचनलाई बनाएका छन्।
यसअघि जनता समाजवादी पार्टीका अध्यक्ष सिके राउतसँग पराजित भएका यादवविरुद्ध यसपटक माओवादीबाट पार्टी प्रवेश गरेका शिवप्रसाद कुशुवाह चुनावी मैदानमा छन्। जनमत पार्टीले नागरिकता विधेयकलाई अघि बढाउने मुद्दालाई बोकेर हिँडिरहेको छ।
तर, जसपा अध्यक्ष यादवलाई नागरिकता विधेयकविरुद्ध दिइएको अभिव्यक्ति उनकै लागि घातक बनिरहेको छ। जनता समाजवादी पार्टी (जसपा)ले नागरिकता ऐन, २०६३ लाई संशोधन गर्न बनेको विधेयकको विरोधमा देशका विभिन्न सहरमा विरोध प्रदर्शन गरेको थियो। उक्त विरोध कार्यक्रमको अगुवाई जसपा अध्यक्ष उपेन्द्र यादवले गरेका थिए।
राज्य व्यवस्था तथा सुशासन समितिबाट पारित भएर प्रतिनिधि सभामा पुगेको नागरिकता विधेयकका कतिपय प्रावधान विभेदकारी भएको भन्दै त्यस समय जसपाले सडक आन्दोलन नै गरेको थियो। मधेसी जनताका नाममा राजनीति गरिरहेका यादवले मधेसका कयौं जनताले नागरिकता नपाउने समस्या समाधान गर्न अड्चन सिर्जना गरेका थिए।
२०७७ असार १६ गते नागरिकता विधेयकको विरोधमा जसपाले देशभरका जिल्ला सदरमुकाम र मुख्य सहरहरूमा विरोध प्रदर्शन र सभा आयोजना गरेको थियो। मधेसी जनताले उनलाई सप्तरी-२ मा सोही कुराको सजाय दिएका थिए। अहिले बारा-२ मा पनि सप्तरी-२ कै नतिजा आउनसक्ने राजनीतिक विश्लेषकहरुको टिप्पणी छ।
