काठमाडौं ,१ जेष्ठ। काठमाडौं उपत्यकामा मेलम्चीको पानी वितरण आजदेखि बन्द गरिएको छ । आयोजना स्थलको मुहानमा मर्मत सम्भार गर्न भन्दै पानी वितरण बन्द गरिएको हो । बितरण दुई सातासम्म बन्द रहने आयोजनाले जाएको छ ।
आयोजनाका अनुसार हेलम्बु वडा नम्बर १ मा रहेको मुहान तथा हेडवक्र्समा सिलिण्डर र गेट नम्बर १ मा जालीसहितका उपकरण राखेर मर्मतसम्भार गर्नुपर्ने भएएको छ । त्यसको लागि दुई साताका लागि पानी वितरण बन्द गरिएको मेलम्ची खानेपानी आयोजनाका सिनियर डिभिजनल इन्जिनियर पदमबहादुर कुँवरले जानकारी दिनुभएको छ। इन्जिनियर कुँवरका अनुसार मर्मत कार्य सामान्य बाढी आएका बेलामा पनि आयोजना सञ्चालनमै राख्न सकिने छ ।
मेलम्चीको पानी पहिलोपटक २०७७ फागुन २२ गते सुन्दरीजलमा ल्याइएको हो । त्यही साल चैत १५ देखि परीक्षण स्वरुप पानी वितरण गरिएको थियो । तर २०७८ असार १ मा मेलम्चीमा आएको बाढीले आयोजना स्थलमा ठूलो क्षति पुर्याएपछि पानी वितरण बन्द भएको थियो ।मुख्य सुरुङ सुरक्षित रहेकाले ढुंगा माटो पन्छाएर २०७८ चैत अन्तिमतिर पुनः पानी वितरण गरिएको हो ।
