बारा,३० असार ।मधेश प्रदेशका बारा जिल्लामा अहिलेसम्म ३० प्रतिशत धान रोपाई भएको छ । कृषि ज्ञान केन्द्र कलैयाकाअनुसार जिल्लाको दक्षिण भेगको तुलनामा उत्तरतर्फ रोपाइँ बढी भएको छ ।
यसपटक लगातारको खडेरीका कारण किसानले समयमै बीउ राख्न नपाएको, ढिलो गरी राखेको बीउ तयार हुन समय लागेको र पानी पनि कम परेको किसानहरूको गुनासो छ ।
कृषि ज्ञान केन्द्र कलैयाका बाली विकास अधिकृत राजनारायण प्रसाद साहले गत वर्ष असार मसान्तसम्म ६० प्रतिशतभन्दा धेरै रोपाइँ भए पनि यसपटक पानी नपरेकाले ३० प्रतिशत मात्रै रोपाइँ भएको बताएका छन् । बारामा १५ हजार ५ सय हेक्टरमा ६८ हजार ३९९ मेट्रिक टन चैते धान उत्पादन हुने गर्दछ भने बर्खे धान अन्तर्गत भदौमा पाक्ने ११ हजार ९०५ हेक्टरमा ५१ हजार १९१ मेट्रिक टन र कात्तिक, मंसिरमा पाक्ने प्रजातिको धान ३४ हजार ११५ हेक्टरमा १ लाख ४३ हजार २८७ मेट्रिक टन उत्पादन हुने गर्दछ ।
बाली विकास अधिकृत साहले यसपटक किसानले ढिलो बीउ राखे पनि अगामी दिनमा मौसम राम्रो भएर पानी परेमा उत्पादनमा खासै कमी नआउने बताए । बारामा किसानहरूले हर्दिनाथ–१, सावा मन्सुली सव–१, बासमति र खुला सिमानाका कारण भारतीय सोना मन्सुली प्रजातिका धान लगाएका छन् ।
