जनकपुरधाम । उपेन्द्र यादव नेतृत्वको जनता समाजवादी पार्टी (जसपा) लाई जनमत पार्टीले सिरहामा धक्का दिएका छ्न।तीन केन्द्रीय सदस्यदेखि नगर अध्यक्षसम्म जनमत पार्टीमा प्रवेश गरेका छ्न।
जसपाका केन्द्रिय सदस्य तथा राजनीतिक समिति सदस्य उदय नारायण यादव, केन्द्रिय सदस्य नथुनी यादव र कार्यकारिणी सदस्य कुलानन्द झा जनमत पार्टीमा प्रवेश गरेका हुन् ।
यस्तै जसपाका सिरहा जिल्ला सदस्य मो. झबु राइन, जसपा मधेश प्रदेश सदस्य मो. हमजा राइन र माओवादी केन्द्रका विद्यार्थी संगठनका सिरहा जिल्ला अध्यक्ष गजेन्द्र ठाकुर लगायतका नेताहरु पनि जनमतमा एकसाथ प्रवेश गरे ।
उनीहरु काठमाडौंस्थित जनमत पार्टीको केन्द्रीय कार्यालय पुगेर राष्ट्रीय अध्यक्ष डा. सीके राउतबाट टिका थापेर पार्टी प्रवेश गरेका छन् । उनीहरुलाई जनमत पार्टीको राष्ट्रिय परिषद केन्द्रीय सदस्य विरेन्द्र साहको पहलमा पार्टी प्रवेश गरेको छ ।
अध्यक्ष डा. राउतले नवप्रवेशी नेताहरुलाई स्वागत गर्दै पार्टीमा सम्मानजनक जिम्मेवारी दिने प्रतिबद्धता जनाए ।
