न्यूजमधेश समाचारदाता
राजबिराज,२८मंसिर।सप्तरी जिल्लाको पुर्वी भेगमा जङ्गली जनावरको आक्रमणबाट एक महिलाको मृत्यु भएको छ भने एक बृद्ध घाईते भएको छ ।
सप्तरीको कञ्चनरुप नगरपालिका वडा नम्बर ६ की मिना सदाकी पत्नि ३५ वर्षीया सीतादेवी सदाको शनिबार बँदेलको आक्रमणमा परी मृत्यु भएको हो। घर नजिकै जंगलमा खर काट्न गएकी सदालाई बँदेलको आक्रमण परी घाइते पश्चात् स्थानीय अस्पतालमा उपचारको लागि लगिदै गर्दा मृत्यु भएको जनाएको छ ।
यसैगरी शनिबारै जंगली हात्तीको आक्रमणमा परी एक वृद्ध गम्भीर घाईते भएका छन्। घाइते हुनेमा सोही नगरपालिका १२ निवासी ७५ वर्षीय सनमान भुजेललाई हात्तीले आक्रमण गरि गम्भीर घाइते बनाएको छ । गहुँको खेतमा पानी लगाउन गएका बेला भुजेललाई हात्तीले आक्रमण गरेको थियो।
उनलाई थप उपचारको आगि कोशी अञ्चल अस्पताल विराटनगर पठाईएको इलाका प्रहरी कार्यालय कञ्चनपुरले जनाएको छ ।
