न्यूजमधेश समाचारदाता
जनकपुरधाम ,२५ पुस। जनकपुरधाम उपमहानगरका मेयर लालकिशोर साह मंगलदिन भएको कुटपिट घटनामा घाईते वडा सदस्य र महिलाहरुलाई भेटेका छन् ।
प्रादेश अस्पताल जनकपुरमा विगत तीन दिनदेखि भर्ना रहेकी घाईते महिलाहरुलाई मेयर साह विहिवार दिउँसो अस्पताल पुगेर भेटघाट गरे । पीडित महिलाहरुले कुटपिट गर्ने पत्रकारहरुलाई कारबाही गर्न माग गरे । मेयर साहसँग पीडित महिलाहरुले भनेकी छन्, ‘गुण्डाको शैलीमा आएर आफूहरुलाई कुटपिट गरेकाले कडा कारबाही हुनुपर्छ ।’
मेयर साहले कुटपिट गर्नेहरुलाई कारबाहीका लागि कदम चाल्ने बताएका थिए । घाईते महिलाहरुको टाउँकोमा चोट लागेको छ । एक महिलाको नाकको हड्डी भाँचेको चिकित्सकले जनाएको छ । मेयर साह भेट्न अस्पताल पुग्दा घाईतेहरुको अनुहार मलिन देखिएको थियो ।
यता, जनकपुरधाम उपमहानगरपालिका कर्मचारी इकाई एशोसिएसन समितिले आन्दोलनको घोषणा गरेको छ । आज पुस २५ गते (शुक्रवार) विहान १० बजेदेखि दिउँसो १ बजेसम्म कालोपट्टी बाँधी पेनडाउन गर्ने निर्णय समितिले गरेको हो । पेनडानबाट नगरबासीमा पर्ने असुविधाका लागि समिति क्षमा समेत मागेको छ ।
