न्यूजमधेश सम्बादाता
जनकपुरधाम,४ जेठ। समग्र विश्वसँगै सिंगो देश कोरोना महामारीको त्रासबाट गुज्रिरहेको अवस्थामा धनुषामा लक डाउनको उल्लघन व्याप्क रुपमा भइरहेको छ ।
बालबालिकाको भेला पारेर पाठ्यपुस्तक बितरण गर्नेदेखि सामान्य अवस्था झैं भींड जम्मा गरेर रिबन काट्न समेत जनप्रतिनिधी अग्रसर हुने गरेको पाइएको छ ।
धनुषाको विदेह नगरपालिकाका मेयरले शनिबार झण्डै सय जनाको भींड जम्मा गरेर आधारभूत स्वास्थ्य चौकीको नवनिर्मित भवनको उद्घाटन गरेका छन् ।
विदेह नगरपालिकाका वडा नम्बर १ झिझा टोलस्थित सामुदायिक भवनमा आधारभूत स्वास्थ्य चौकी संचालन गरिएको छ । मेयर दासले शनिबार दिउँसो यसैको रिबन काटेर उद्घाटन गरेका छन् ।
मेयर दासले रिबन काटिरहँदा उनको वरिपरि व्यक्ति झुमिएको छन् फोटो खिंचाउनका निम्ति । त्यसमध्ये अग्रपंक्तिका व्यक्तिले मात्रै मास्क लगाएका देखिन्छन् ।
लकडाउनलाई धज्जिया उडाउँदै आधारभूत स्वास्थ्य संस्थाको रिबन काटेर उद्घाटन गरेका मेयरदास भने धेरै भींड नगरिएको बताए । उनले उद्घाटन गर्ने समयमा धेरै मान्छे नभएको दावी गरे ।
उनले भींड भएपछि दूरी कायम गराउन १६ जना प्रहरीलाई बोलाएको बताए ।
यसअघि शुक्रबार धनुषाकै शहीद नगरपालिका वडा नम्बर ८ का विद्यालयले बालबालिकाको भेला गरी पाठ्यपुस्तक बितरण गरेका थिए ।
