रुपेन्द्र पटेल
रौतहट ,१७ फागुन। भोजपुरी कलाकार खेसारीलाल यादवमाथि ढुङ्गा प्रहार भएको छ । रौतहटको मौलापुर नगरपालिका– ५ पतौरा महादेव मन्दिरमा महाशिवरात्रीको अवसरमा आयोजित मधानी महायज्ञमा प्रस्तुती दिन आएका कलाकार यादवमाथि ढुङ्गा प्रहार भएको हो ।
यादवले स्टेजमा गीत गाउँदै गर्दा उनीमाथि ढुङ्गा प्रहार भएको थियो । उनले दर्शलाई शान्त हुन आग्रह गरेका थिए । दर्शक श्रोताको मायाका कारण आफू दोस्रो पटक कार्यक्रममा उपस्थित भएको बताउँदै उनले उच्छृङ्खल गतिविधि नगर्न आग्रह गरे ।
यसअघि सुनसरीको बर्जु गाउँपालिकामा आयोजित उनी आउने महोत्सवमा पनि चारवटा गाडी र स्टेजमा आगजनी र तोडफोड भएको थियो ।
उक्त घटना सम्झिदै उनले भने, ‘पहिलो पटकको त्यति ठूलो घटनापछि पनि आएको छु । मलाई माया गर्नुको सट्ट ढुङ्गा÷ईट्टा प्रहार गर्नुहुन्छ । यस्तो व्यावहारले अर्को पटक नेपाल आउन सोच्नुपर्ने भयो ।’
उनले आफू मात्रै नभएर अरु कलाकार पनि नेपाल नाउने बताए । उनले भने, ‘तपाईंहरुको सम्मानको लागि आएको हुँ, म दुश्मन हैन, माया गर्नुहोस्, माया लिनुहोस् ।’
यद्यपी उनलाई लक्षित गरेर गरिएको ढुङ्गा प्रहारबाट उनी बच्न सफल भएका थिए ।
