शैलेन्द्र महतो
बैशाख १२ , जनकपुरधाम । धनुषाको मिथिला नगरपालिकामा नेकपा एमालेले निवर्तमान मेयर हरिनारायण महतोको टिकट खोसेको छ।
नेकपा एमाले नगर समितिबाट एकल सिफारिस भएका महतोको टिकट अन्ततः राजाराम महतोले पाउन सफल भएका छन्।
राजाराम पूर्व रियलस्टेट व्यावसायी हुन्। २०७४ को निर्वाचनमा काँग्रेसबाट टिकट नपाएपछि स्वतन्त्र उम्मेदवार बनेर उनले चुनाव लडेका थिए।
जसकाकारण एमालेबाट हरिनारायणलाई जित्न सहज भएको थियो।
एमाले धनुषा जिल्ला अध्यक्ष रहिसकेका हरिनारायणले टिकट वितरणमा रातारात खेल भएको बताए।
उनले सोमबार बिहानमात्रै आफूलाई टिकट नदिने निर्ण भएको बताए। महतोले नेता रघुवीर महासेठ टिकट वितरणमा मनोमानी गरेको आरोप लगाए।
अब यसबारेमा थप रणनीति बनाउन नेता कार्यकर्तासँग छलफल गरिरहेको उनले बताए।
राजारामलाई हरिनारायणले नै पहल गरेर केही वर्षअगाडि एमालेमा प्रवेश गराएका थिए। निवर्तमान मेयर हरिनारायण एमालेका केन्द्रीय सदस्य हुन्।
