न्युजमधेस डेस्क
जनकपुरधाम,२९ असार।
एक पसलमा बिक्रीका लागि राखिएको सिल प्याक पानी बोतलमा माकुरो भेटिएको छ ।
कैलालीको टीकापुरमा आकाश गङ्गा वाटर एण्ड वेभरेज इन्ड्रस्टिज बर्दगोरिया कैलालीले उत्पादन गर्दै आएको पानीको बोतलमा माकुरो भेटिएको हो ।
टीकापुरमा रहेको बिभोर मेडिकलमा ग्राहकले पानीको बोतल मागेपछि बोतलमा माकुरो देखिएको मेडिकलका सञ्चालक सञ्जय भण्डारीले बताए । ‘एकजनाले पानीको बोतल माग्नुभयो, हामीले दियौं, बोतलको पिंधमा माकुरो देखियो ’ भण्डारीले भने, ‘पानीको सिल प्याक बोतलमा माकुरो भेटिएपछि उत्पादक कम्पनीलाई खबर गर्दा त्यसलाई बेवास्ता गर्नुभयो र स्वीकार गर्नुभएन ।’
उपभोक्ता हित संरक्षण मञ्च टीकापुरका अध्यक्ष एकेन्द्र तिमिल्सिनाले सिल प्याक पानीभित्र माकुरो देखिनु उपभोक्तामाथिको गम्भीर लापर्बाही भएको बताए । ‘यो उपभोक्तामाथिको गम्भीर लापर्बाही हो । यिनलाई कारबाहीको दायरामा ल्याउन जरुरी छ ।’
आकाश गङ्गा इन्ड्रस्टिजका सञ्चालक ओमनारायण महतोले आफूले उत्पादन गरेको पानीमा त्यस्तो हुन नसक्ने दावी गरे । उनले यो कसैले रचेको प्रोपोगान्डा भएको भन्दै व्यवसायलाई कमजोर बनाउन खेलिएको खेल भएको सुनाए ।
