न्यूजमधेश डेस्क
रौतहट ,६ श्रावण । रौतहटमा वीपी कोइरालाको ४० औं स्मृति दिवसको अवसरमा वृक्षरोपण गरिएको छ। वीपी कोइराला युवा नेतृत्व विकास मञ्च रौतहटको आयोजनामा जन वृक्षरोपण कार्यक्रम गरिएको हो।
चन्द्रपुर-६ स्थित जिपी उद्यान डावरी पार्कमा शुक्रवार एक कार्यक्रम गरी वृक्षरोपण गरिएको नेपाली कांग्रेस चन्द्रपुर नगर सभापति मुकेश गिरीले बताए।
मञ्चको जिल्ला अध्यक्ष अधिकार लामिछानेको अध्यक्षतामा सम्पन्न उक्त वृक्षरोपणमा विभिन्न प्रजातिका गरी २ सयको संख्यामा वृक्षरोपण गरिएको अध्यक्ष लामिछानेले बताए।
प्रमुख अतिथि मधेश प्रदेशसभा सदस्य धनलाल थोकरले वीपीको नाममा बर्सेनि वृक्षारोपण गरिँदै आए पनि त्यसको उचित संरक्षण हुन नसक्दा अर्थहिन बनिरहेको बताउँदै रोप्ने मात्र गर्ने होइन‚ यस्को उचित संरक्षणमा सबै मिलेर लाग्नु पर्ने बताए।
