न्यूजमधेश डेस्क
काठमाडौं,३१ भाद्र।स्वास्थ्य सेवा सुधारको माग राख्दै धनगढीमा आमरण अनसनमा बसेका प्राडा गोविन्द केसीसँग वार्ता गर्न सरकारले वार्ता टोली गठन गरेको छ।
प्रधानमन्त्री तथा मन्त्रिपरिषदको कार्यालयका सचिवको संयोजकत्वमा वार्ता टोली गठन गरेको हो। वार्ता टोलीमा स्वास्थ्य तथा जनसंख्या मन्त्रालय र शिक्षा मन्त्रालयका सचिव र नेपाल चिकित्सक संघका प्रतिनिधि सदस्य रहने गरी वार्ता टोली गठन गरिएको प्रधानमन्त्री कार्यालयद्वारा जारी विज्ञप्तिमा जनाइएको छ।
चिकित्सक संघका प्रतिनिधिलाई भने वार्तामा मध्यस्थता गर्ने गरी टोलीमा राखिएको बताइएको छ। वार्ता टोली गठनसँगै सरकारले डा केसीलाई अनसन तोड्न आग्रह गरेको छ। डा केसीले विभिन्न सात बुँदे माग राखेर पाँच दिनदेखि अनसनमा छन्। याे बिसाैं पटक अनसन हाे।
यस्तै, सरकारले वार्ता टोली गठन गरेसँगै डा केसीका तर्फबाट पनि वार्ता टोली गठन भएको छ। डा केसीका तर्फबाट डा जीवन क्षेत्रीको संयोजकत्वमा ओम प्रकाश अर्याल, डा लिजन महर्जन र प्रितम सुवेदी सदस्य रहेको टोली गठन गरिएको छ।
