न्यूजमधेश डेस्क
राजविराज ,९ पौष ।जनमत पार्टीका अध्यक्ष एवं प्रतिनिधिसभा सदस्य डा.सीके राउतले गजेन्द्रनारायण सिंह अस्पताल सुधारको प्रयास थालेका छन् । उनले अस्पताल सुधारको पहिलो कदम भन्दै अस्पतालमा सुझाव पेटिका राखेका छन् ।
सप्तरी २ बाट प्रतिनिधि सभा सदस्यमा निर्वाचित डा.राउतले अस्पतालसम्बन्धी कुनै गुनासो वा सुझाव भए दिन भन्दै सुझाव पेटिका राखेका हुन् । सुझाव पेटिकामा प्रतिनिधिसभा र प्रदेशसभा सदस्यहरूको नाम तथा सम्पर्क नम्बरसमेत उल्लेख गरिएको छ ।
सप्तरीको राजविराजमा रहेको उक्त सरकारी अस्पताल पछिल्लो समय रेफरल सेन्टरमा सीमित भएको भन्दै अस्पताललाई बचाउने आफ्नो अभियान भएको उनको भनाइ छ । अस्पतालले निशुल्क दिनुपर्ने औषधि दिएन भने खबर गर्न उनले भनेका छन् ।
सामाजिक सञ्जालमा सन्देश लेख्दै डा. राउतले भनेका छन्, ‘गजेन्द्र नारायण सिंह अस्पताल राजविराज सुधारको पहिलो कदम–जनताको सुझाव र सहयोगबाट नै यो सम्भव हुन सक्छ । रेफरल सेन्टरमा सीमित हुन पुगेको अस्पताललाई जोगाऔँ । निःशुल्क पाउनुपर्ने औषधी पनि अस्पतालले बिरामीलाई उपलब्ध गराएन भने त्यो पनि खबर गर्नुहोला ।’
सो जन आवाज तथा सुझाव पेटिका शनिबार अस्पताल अगाडि प्रदेश सभा सदस्य सतिशकुमार सिंह र महेश प्रसाद यादवको उपस्थितिमा लगाएको छ।
