जनकपुरधाम,२ माघ।आइतबार बिहान पोखरामा यती एयरलाइन्स विमान दुर्घटनामा निधन भएकाहरूको सम्झनामा सोमबार साँझ जनकपुरधामको जनकचौकमा दीप प्रजवलन गरिएको छ ।
जनमत पार्टी धनुषाले आज साँझ मधेश प्रदेशको राजधानी जनकपुरधामको जनक चौकमा दीप प्रज्वलन गरी शोक मनाएका हुन्।
आइतबार बिहान काठमाडौंबाट पोखराको लागि उडेको यती एयरको बिमान पोखरा विमानस्थलमा अवतरण गर्ने क्रममा सेतो खोचमा दुर्घटनामा परेको थियो ।
उक्त विमानमा सवार चालक दलका चार सदस्यसहित कूल ७२ जनाको निधन भएको छ । वरिष्ठ क्याप्टेन कमल के.सी र पाइलट अञ्जु खतिवडाले उडाएको उक्त विमानमा १५ जना विदेशी नागरिक सवार थिए ।
नेपाली सेना, नेपाल प्रहरी, सशस्त्र प्रहरी लगायत अन्यले खोज तथा उद्दार गरेर सबै शवहरू फेला पारेका छन् ।
सो कार्यक्रममा मधेश प्रदेशका सांसद संजय कुमार यादव,गैर आवासीय मधेसी संघका अन्तर्राष्ट्रिय अध्यक्ष ई.शम्भुनाथ साह,जनमत पार्टीका नेताकार्यकर्ताहरुकोसमेत उपस्थितिमा दीप प्रज्वलन गरि ज्यान गुमाएकाहरुलाई आत्माको शान्तिको कामना गरेका हुन।
