न्यूजमधेश सम्बादाता
काठमाडौं,२० फाल्गुण । कोरोना भाइरसको आशंकामा कतारबाट फर्किएका एक नेपालीलाई आइसोलेसनमा राखिएको छ ।
मंगलबार चार नेपालीलाई डिस्चार्ज गरेकै दिन थप एक जनालाई कोरोनाभाइरसको आशंकामा आइसोलेसन वार्डमा भर्ना गरिएको टेकुस्थित शुक्रराज ट्रपिकल तथा सरुवा रोग अस्पतालले जनाएको छ ।
कतारबाट फर्केका ५४ वर्षीय ती व्यक्तिलाई कोरोनासँग मिल्ने लक्षण देखिएपछि आइसोलेसनमा भर्ना गरिएको हो । उनमा रुघाखोकी र श्वासप्रश्वासको समस्या देखिएको अस्पताले जनाएको छ । यीसहित अहिले आइसोलेसन वार्डमा भर्ना हुने दुई जना रहेका छन् ।
यसअघि, चीन र दक्षिण कोरियाबाट फर्किएका चार नेपाली कोरोना भाइरसबाट सङ्क्रमित नभएको पाइएको थियो । दक्षिण कोरियाबाट फर्किएका चार तथा चीनबाट फर्किएका एक नेपालीको टेकुस्थित शुक्रराज ट्रपिकल तथा सरुवा रोग अस्पतालमा स्वास्थ्य परीक्षण गरिएको थियो । कोरियाबाट फर्किएका तीन तथा चीनबाट फर्किएका एक जनामा कोरोना भाइरसको परीक्षण नतिजा ‘नेगेटिभ’ भेटिएको स्वास्थ्य तथा जनसङ्ख्या मन्त्रालयअन्तर्गतको स्वास्थ्य आपत्कालीन कार्य सञ्चालन केन्द्रका प्रमुख सागर दाहालले जानकारी दिएका छन् ।
कोरियाबाट फर्किएका एक जनाको स्वास्थ्य रिपोर्ट आउन भने बाँकी छ । चीनबाट घर फर्किएकालाई शनिबार तथा कोरियाबाट फर्किएकालाई आइतबार आइसोलेसनमा राखिएको थियो । चारै जना घर फर्किएका छन् ।- हुलाकीन्यूज
