मनोज बनैता, सिरहा, १५ बैशाख । सिरहाका औरही गा. पा ले लकडाउनको महिनौं बितिसक्दा पनि गरिब, मजदुर लगायतलाई राहत सामग्री बितरण गरेको छैन । गा.पा को ध्यानाकर्षण गराउने गरि स्थानीय युवाले बिरोध स्वरुप अध्यक्षका लागि चन्दा संकलन गर्न थालेको खबर छ । चन्दा सहयोग गा.पा प्रमुख सिद्धार्थ यादवलाई बुझाउने जानकारी स्थानीयले दिएका छन । ‘समस्यामा स्थानीय अभिभावक भएर उभिनुपर्छ कि पर्दैन ? युवा बिबेक दासले प्रश्न गरे । उनले भने ‘औरही गा.पा प्रमुखको सर्वत्र आलोचना भइरहेको छ यधपी वहाँ आफ्नो हठमा अडिक रहेर आम जनतालाई दुःख दिनु गा.पा को लागि दुर्भाग्य हो’
युवा यादवको अनुसार अध्यक्ष सिद्धार्थ यादवमा रहेको मृत संवेदनाहरूलाई जगाउनका लागि यो अभियान चलाएको बताए । राहत नपाउँदा गरिब मजदुरका परिवार भोकै मर्ने स्थितिमा पुगेका छन्। राहत वितरणमा ढिलाइ भइरहेको भन्दै गाउँगाउँमा जनआक्रोस बढ्दै गएको छ।
राहत वितरण गर्न पटकपटक दबाब दिए पनि अध्यक्ष यादवले वास्ता नगरेपछि अब उनकै लागि राहत संकलन थालेको स्थानीय को आरोप छ ।राहत वितरणमा ढिलाइ भइरहेको विषयमा बुझ्न खोज्दा गाउँपालिका अध्यक्ष यादवसँग सम्पर्क हुन सकेन।
वडा नम्बर ५ का वडाअध्यक्ष दिलिप यादवले राहत वितरण गर्नुपर्ने विवरण पनि गाउँपालिकामा बुझाइसकेको भन्दै वितरणमा किन ढिलाइ गरेको विषयमा कुनै जानकारी नगराएको प्रतिक्रिया दिए। उनले राहत वितरणमा अध्यक्ष यादवले राजनीति गरिरहेको आरोपसमेत लगाए।
कोरोना भाइरसबाट जोगिन सरकारले देशलाई लकडाउन गरेको एक महिना नाघिसकेको छ। मजदुरी गरेर साँझ विहान छाक टार्ने गरिब मजदुरहरु लकडाउनका कारण काम पाइरहेका छैनन्। जसका कारण उनीहरु मुस्किलमा परेका छन्।
लकडाउनमा हातमुख जोड्न समस्या हुनेहरुका लागि राहत वितरण गर्न संघीय सरकारले स्थानीय तहलाई तत्कालै निर्देशन जारी गर्यो। प्रदेश सरकारले राहत वितरण गर्न महानगरपालिकालाई २५ लाख, उपमहानगरपालिकालाई २० लाख, नगरपालिकालाई १५ लाख र गाउँपालिकालाई १० लाखका दरले रकम निकासा गरेको पनि तीन साता बितिसकेको छ। तर प्रदेश २ का अधिकांश स्थानीय तहले राहत वितरण गर्न सकेका छैनन्।
