अंगद यादव
नवलपरासी पश्चिम ,२६ जेठ । नेपाल भारतको सिमामा स्थानिय र सशस्त्र प्रहरी बिच झडप हुँदा सशस्त्र प्रहरीले चार राउण्ड हवाई फायर गरेको छ । नलपरासी पश्चिमको प्रतापपुर गाउँपालिका वडा नं.५ संग जोडिएको बसहिया सिमानामा झडपमा ६ सशस्त्र प्रहरी र ४ स्थानिय घाइते भएका छन् ।
स्थानिय एक महिलाले भारतबाट मल ल्याउदै गर्दा उक्त सिमानाकामा खटिएका सशस्त्र प्रहरीले महिलालाई रोक्न खोज्दा लठ्ठी प्रहार गरेको महिलाले बताउछिन ।महिलालाई लठ्ठी प्रहार गर्दा स्थानियहरु आक्रोसित भई चेक पोष्टमा बसेका सशस्त्र प्रहरीमाथि सयौंको सख्यामा आक्रमण गर्दा सशस्त्र प्रहरी तर्फबाट ६ जना जवानहरु गम्भिर घाईते र स्थानिय करिब ४ जना घाईते भएका थिए ।
प्रतिरक्षाका लागि प्रहरीले चार राउण्ड हवाई फायर गरेको शसस्त्र प्रहरीका एसपी भरत खनियाले जानकारी दिए । घाइते सशस्त्र मध्ये तीनजनाको आँखामा गम्भिर चोट लागेको बताइएको छ ।
अन्यको निधारमा चोट लागेको छ । स्थानियले गुलेलीमा सिसा राखेर हानेकाले सशस्त्र प्रहरीको टाउको र आँखामा गम्भिर चोट लागेको हो । अहिले घाइतेहरुको पृथ्वी चन्द्र अस्पताल परासीमा उपचार भइरहेको छ ।
तनावग्रस्त बनेको सो ठाउँमा अहिले स्थिति भने सामान्य बनेको छ । बिवाद मिलाउन शसस्त्र प्रहरीका अधिकारी र प्रदेश सभा सांसद अजय शाहीले प्रतिबद्धता गरेपछि स्थानीयहरु तनावग्रस्त ठाउबाट आफ्नो घर फर्केका थिए ।
लकडाउनमा नेपालमा मल नपाउँदा र कोरोनाको कारणले सिमानाका बन्द हुदा भारतबाट खुल्ला रुपले मल ल्याउन नमिलेको यस्तो अवस्था उत्पन्न भएको स्थानीयले बताएका थिए ।
